Amérika prézidénti donald tiramp düshenbe küni hindistangha bolghan tenqidini ikki hesse kücheytip, bu dölet bilen bolghan soda munasiwitini “pütünley bir tereplime oyun!” Dep atidi. Bu sözler hindistan bash ministiri naréndra modining shangxey hemkarliq teshkilatining yighinigha qatnishish üchün xtaygha seper qilghandin kéyin éytildi.
Tiramp Truth Social diki bir yazmisida, hindistanning chégra béjini nölge chüshürüshni teklip qilghanliqini, emma buning “bek kéchikip qalghanliqi” ni, hemde bu döletning buni “nechche yillar burun” qilishi kéreklikini éytti, emma bu teklipning qachan bérilgenliki toghrisida tepsiliy chüshenche bermidi.
Bu, amérika hindistangha %50 baj qoyghan , jümlidin ötken ayda rusiye néfiti sétiwalghanliqi üchün %25 ikkinchi derijilik baj qoyghan bir peytte yüz berdi. Hindistan buni “heqqaniy emes, aqilane emes we asassiz” dep atidi.
Tiramp hindistanning rusiyedin néfit we qoral sétiwalghanliqini qayta tekitlep, yéngi déhlini amérikigha “intayin köp mal sétish” bilen birge, amérika éksportigha yuqiri baj qoyush bilen eyiblidi.
“Buning sewebi, hindistan bizdin hazirghiche shundaq yuqiri baj éliwatidu, bu her qandaq döletning eng yuqirisi bolup, bizning karxanilirimiz hindistangha mal satalmidi. Bu pütünley bir tereplime soda boldi!” Dep yazdi.